Ymgysylltu, Gwrando, Gweithredu

Mae gennym Strategaeth Cyfranogiad Tenantiaid o'r enw “Ymgysylltu, Gwrando, Gweithredu” sy'n cryfhau ein cysylltiad ni gyda thenantiaid a 'llais y tenantiaid' er mwyn llunio ein gwasanaethau.

Ein nod yw gwella ein gwasanaethau trwy gael tenantiaid i gymryd rhan lawn yn y gwaith o ddatblygu gwasanaethau a dylanwadu ar sut byddant yn cael eu darparu.

Byddwn yn gwneud hyn trwy gael digwyddiadau a gweithgareddau, grwpiau fel y Panel Cynghori Preswylwyr, y Grŵp Ymateb Cyntaf a thrwy weithio mewn partneriaeth gyda 'Byw yn Annibynnol/Rhwydwaith Tai Pobl Ifanc' a phrosiect 'Bus Stop'.

Cafodd cynlluniau newydd eu sefydlu hefyd, fel y 'Grant Datblygiad Personol' a'r 'Gronfa Gymunedol' i helpu tenantiaid unigol neu grwpiau gwirfoddol, cymunedol, hamdden neu grwpiau preswylwyr.

Panel Ymgynghorol Preswylwyr

Rôl y Panel Ymgynghorol Preswylwyr yw bod yn 'gyfaill beirniadol' i herio'r rhai sy'n llunio polisïau a gwneud penderfyniadau, a gadael i leisiau a phryderon preswylwyr gael eu clywed.

Bydd y Panel yn cyfarfod bob mis, ym Mangor a Chyffordd Llandudno am yn ail, ac mae ganddo 8 aelod. Yn ystod y flwyddyn, mae'r Panel wedi bod yn ymwneud â:

• Monitro a rhoi sylwadau ar ein hadroddiadau perfformiad chwarterol
• Rhoi mewnbwn ar ein Strategaeth Cynaliadwyedd
• Adolygu ein Llawlyfr Tenantiaid
• Adolygu cynhyrchion sy'n cael eu defnyddio gan ein tîm gwaith Cynnal wedi'i Gynllunio ni e.e. y byrddau ar ben unedau cegin
• Adolygu Gwefan Tai Gogledd Cymru
• Hunanarfarnu
• Prosiect Digital First – roedd tri aelod o'r Panel yn rhan o dîm prosiect gyda rhai o'r staff, yn edrych ar y gwasanaethau rydym yn eu darparu'n ddigidol. Mae'r Porth Tenantiaid wedi cael ei ddatblygu, ac mae'n arf sydd ar gael ar lein yn ddi-dâl fel bod tenantiaid yn gallu logio i mewn a chael gwybodaeth am eu cartref.
• Prosiect Gwella Gwasanaethau Cwsmer

Ers Ebrill 2015, mae dau aelod wedi symud i'r Bwrdd Gwasanaethau Landlord.

Mae'r Panel Ymgynghorol Preswylwyr wedi cael cyfrifiaduron tabled i gefnogi eu gwaith fel aelodau. Bydd y rheiny'n ddefnyddiol ar gyfer darllen adroddiadau cyn cyfarfodydd yn ogystal ag ar gyfer gwneud ymchwil.

Dyma ddywedodd Roger, sy'n aelod o'r Panel:

"Mae bod yn aelod o'r Panel wedi fy helpu i ddatblygu fy sgiliau cymdeithasol a sgiliau cyfathrebu, mewn awyrgylch o gyfeillgarwch ac ymlacio, ac ar yr un pryd yn fy helpu i wella effeithlonrwydd Tai Gogledd Cymru a hefyd ansawdd bywyd ei thenantiaid."

Byw yn Annibynnol/Rhwydwaith Tai Pobl Ifanc

Mae hwn yn brosiect partneriaeth gyda Cartrefi Conwy, Grŵp Cynefin a phrosiect Bus Stop, wedi'i anelu tuag at bobl ifanc. Bydd preswylwyr ifanc Tai Gogledd Cymru a'r ddau landlord cymdeithasol arall yn cymryd rhan mewn cyfarfod Rhwydwaith Tai Pobl Ifanc, sy'n digwydd bob pythefnos ac yn gweithio ar wahanol brosiectau.

Roedd gan y Rhwydwaith 7 o bobl yn cymryd rhan, gyda 2 ohonynt yn breswylwyr Tai Gogledd Cymru.

Meddai Sam:

"Rwy'n meddwl ei fod yn syniad da iawn ac rwyf wedi gwneud ffrindiau newydd. Mae angen mwy o wybodaeth am dai am eu bod nhw'n eich trin chi fel pe bai chi'n gwybod popeth ond go iawn does gennych chi ddim syniad."

Mae'r grŵp wedi datblygu gêm fwrdd 'Byw yn Annibynnol'. Cafodd y gêm ei datblygu i helpu pobl ifanc i ddysgu am sgiliau bywyd fel rheoli arian a chostau byw. Bydd y gêm fwrdd ar gael i fwy o bobl rŵan, gyda sefydliadau'n cael hyfforddiant ar sut i'w defnyddio fel arf ar gyfer dysgu, gyda phobl ifanc.

Darllen Stori

Mae'r prosiect yma wedi ennill Ymgyrch y Flwyddyn yng Ngwobrau Tai Cymru y CHI yn Nhachwedd 2015.

Mae gwefan wedi cael ei datblygu rŵan, ar ôl ymgynghori gyda phobl ifanc, ac ar gael fel adnodd http://www.goingitalone.co.uk/cy/

Y cam nesaf yn y Prosiect fydd trefnu Digwyddiad Ieuenctid fydd yn hyrwyddo'r Rhwydwaith Tai Pobl Ifanc a denu aelodau newydd.

Grant Datblygiad Personol

Mae ein grant datblygiad personol wedi'i ddatblygu i daclo rhwystrau ariannol allent fod yn atal ein tenantiaid rhag gallu cael mynediad at addysg, hyfforddiant neu gyflogaeth.

Roedd 5 cais yn llwyddiannus, a daeth un o'r rheiny oddi wrth denant o'r enw Helen ym Mhorthaethwy:

"Mae'r Grant Datblygiad Personol wedi caniatáu i ni fynd un cam yn nes at agor busnes bach. Heb y grant, mi fyddai wedi cymryd llawer o fisoedd eto i gael yr holl offer sydd ei angen. Roedd y grant yn £250, i gael peiriant pacio 'shrink wrap' er mwyn cadw, diogelu a chyflwyno ein cynnyrch. Roedd yn syml iawn gwneud cais am yr arian, mi wnes i'r cyfan mewn un e-bost ac roedd wedi'i orffen yn gyflym. Roeddwn i'n disgwyl cael llawer o drafferth a rhwystrau ond mewn gwirionedd mi oedd yn gwbl wahanol i hynny."

Mae Robin o Gonwy yn astudio Celf a Dylunio yng Ngholeg Llandrillo –
"Rydw i'n astudio celf yng Ngholeg Llandrillo ac wedi bod yn wirioneddol brin o ddeunyddiau celf, roeddwn i'n ei chael yn anodd i ateb gofynion y tiwtoriaid. Roeddwn i'n syrthio ar ôl gyda fy ngwaith celf ond diolch i Dai Gogledd Cymru roedd grant i mi brynu offer celf, ac rydw i'n wirioneddol ddiolchgar am hynny a ddim yn sicr beth fyddwn wedi'i wneud hebddo."

Tracy ym Mae Colwyn:
"Roeddwn i wedi penderfynu, yn lle bod am flynyddoedd mewn gwaith oedd yn arwain at ddim arall neu waith tymhorol, fy mod eisiau gweithio yn y gwasanaeth iechyd gwladol, ac eisiau dechrau astudio Cwrs Gweinyddu Meddygol Lefel 3 yn llawn amser. Rydw i'n fam sengl ar fudd-daliadau a doedd dim modd i mi fynd ar y cwrs heb gael y grant."