News Categories: Digwyddiadau

Prynhawn Agored yng Nghae Garnedd, Bangor 7fed Hydref

Mae Cae Garnedd, eiddo Gofal Ychwanegol mwyaf newydd Tai Gogledd Cymru yn agor ei drysau ar ddydd Mercher 7 Hydref, ac yn eich gwahodd i Brynhawn Agored.

Dewch draw i gael golwg ar y cyfleusterau gwych a darganfod mwy am Ofal Ychwanegol.

Pryd: Dydd Mercher, 7fed Hydref 2015, 3 – 6yp
Lle: Cae Garnedd, Penrhosgarnedd, Bangor , Gwynedd, LL57 2NH

Mae Gofal Ychwanegol yn cynnig ffordd arall o fyw i bobl hŷn. Mae’n galluogi byw’n annibynnol gyda gofal a chefnogaeth hyblyg 24 awr y dydd.

Am fwy o wybodaeth am y Prynhawn Agored neu ynghylch Cae Garnedd cysylltwch â ni ar 01492 563287.

Adran Tai â Chefnogaeth yn arddangos ei gwasanaethau allweddol i breswylwyr bregus

Mae adran Tai â Chefnogaeth wedi cynnal digwyddiad partner galw heibio i arddangos y gwasanaethau a’r gefnogaeth y maent yn eu darparu i’w tenantiaid.

Yn gynyddol mae Tai Gogledd Cymru yn un o arweinwyr maes Gwasanaethau Tai â Chefnogaeth, gan ddarparu gwasanaethau rhagorol i ddefnyddwyr gwasanaeth a chyllidwyr ar draws gogledd Cymru.

Eglurodd Lynne Evans, Pennaeth Tai â Chefnogaeth gyda Tai Gogledd Cymru:

Rydym yn darparu ystod eang o lety a chefnogaeth a gwasanaethau cymorth i bobl fregus ledled gogledd Cymru, gan gynnwys pobl ddigartref a rhai sy’n cysgu ar y stryd, pobl ifanc sy’n gadael gofal, pobl â phroblemau iechyd meddwl, a phobl ag anableddau dysgu.

Roedd y digwyddiad hwn yn gyfle gwych i gyfarfod â phartneriaid a chyllidwyr ac atgyfnerthu’r gwasanaethau rydym yn eu cynnig, yn ogystal â thrafod sut y gall ein llety a’n gwasanaethau gefnogi eu cleientiaid.”

Daeth nifer o bobl leol allweddol draw i gefnogi’r digwyddiad a drefnwyd gan Kerry Jones, Rheolwr Cynllun TGC. Roedd y mynychwyr yn cynnwys Maer Bae Colwyn, y Cynghorydd Doctor Sibani Roy a’r Cynghorydd Philip Edwards, a achubodd ar y cyfle i ymweld â stondinau ardal yr adran, gan siarad â staff a defnyddwyr gwasanaeth.

Dywedodd Lynne Evans, Pennaeth Tai â Chefnogaeth gyda Tai Gogledd Cymru:

Roedd defnyddwyr gwasanaeth Tai â Chefnogaeth yn bresennol yn y digwyddiad ac mi wnaeth y rhai oedd yno dreulio amser yn siarad â nhw am eu taith tai.

Mae dau o’r defnyddwyr gwasanaeth oedd yn bresennol, Peter a Patrick, yn enghreifftiau gwych o sut mae’r broses yn TGC yn gweithio, gan fod y ddau wedi symud ymlaen yn llwyddiannus i fyw’n annibynnol yn eu heiddo eu hunain, diolch i’r gefnogaeth a gynigiwyd gan TGC. Mae llwyddiannau fel hyn yn gwneud ein swyddi werth chweil.”

Caiff nifer o gynlluniau Tai â Chefnogaeth TGC eu hariannu gan Raglen Cefnogi Pobl Llywodraeth Cymru. Yng Nghymru, cafwyd pwysau cynyddol ar y ffynhonnell ariannu yma, gyda thoriadau blwyddyn ar ôl blwyddyn a mwy yn yr arfaeth. Mae digwyddiadau fel hyn yn annog mwy o gydweithio gan fod hynny’n hanfodol er mwyn cadw’r gwasanaethau i fynd.

Dywedodd Lynne Evans, Pennaeth Tai â Chefnogaeth gyda Tai Gogledd Cymru:

Rydym yn gefnogwyr ymgyrch ‘Gadewch i ni barhau i Gefnogi Pobl’. Nod yr ymgyrch yw sicrhau buddsoddiad parhaus yn y Rhaglen Cefnogi Pobl a sicrhau bod pobl sy’n cael eu gwthio i’r cyrion ac sy’n wynebu risg yn parhau i gael eu hamddiffyn.”

 

Prif Weinidog Cymru yn agor Cae Garnedd yn swyddogol

Ar ddydd Mercher 2 Medi, 2015 agorwyd Cae Garnedd, sef cynllun Gofal Ychwanegol arloesol Tai Gogledd Cymru, yn swyddogol gan Carwyn Jones AC, Prif Weinidog Cymru.

Daeth preswylwyr, staff a gwesteion ynghyd i ddathlu agoriad swyddogol y cynllun a rhoddodd Carwyn Jones AC help llaw wrth blannu coeden addurnol i nodi’r achlysur cyn cyfarfod preswylwyr dros de prynhawn.

Mae ‘Cae Garnedd’ yn gynllun Gofal Ychwanegol newydd gwerth £8.35 miliwn a adeiladwyd ym Mhenrhosgarnedd, Bangor, a ddatblygwyd mewn partneriaeth rhwng Tai Gogledd Cymru, Cyngor Gwynedd a Llywodraeth Cymru. Y cynllun hwn yw’r cyntaf o’i fath ar gyfer Bangor ac mae’n cynnig ffordd amgen o fyw ar gyfer pobl dros 55 oed, gan ddarparu byw’n annibynnol wedi’i gefnogi gan raglen gofal a chefnogaeth y gellir ei haddasu a’i hasesu wrth i’w hanghenion unigol yn newid.

Manteisiodd gwesteion hefyd ar y cyfle i gael eu tywys o amgylch y cyfleusterau gwych yng Nghae Garnedd. Mae’r cynllun yn cynnwys 15 o fflatiau un ystafell wely a 27 fflat dwy ystafell wely manyleb uchel, gyda phob un yn cynnwys ei chegin ei hun, ardal fyw ac ystafell ymolchi, yn ogystal â llu o ardaloedd cymunedol modern a chartrefol gan gynnwys lolfa; bwyty; lle trin gwallt ac ystafell driniaeth harddwch a llawer mwy.

Dywedodd y Prif Weinidog, Carwyn Jones:

Mae’r cyfleusterau yma yng Nghae Garnedd yn rhagorol ac yn rhoi cyfle i bobl hŷn barhau i fyw’n annibynnol. Rwy’n falch bod Llywodraeth Cymru yn gallu cefnogi’r cyfleuster hwn gyda £4.8m o arian Grant Tai Cymdeithasol. Mae cynlluniau fel Cae Garnedd yn lleihau’r ddibyniaeth ar ofal preswyl neu’r system gofal hir dymor a sicrhau nad yw pobl mewn perygl o fod yn unig neu’n ynysig.

Mae cynlluniau fel Cae Garnedd hefyd yn rhoi hwb i’r economi drwy gefnogi adeiladu a’r gadwyn gyflenwi, a thrwy ddarparu swyddi a phrentisiaethau ar gyfer yr ardal leol.”

Dywedodd Paul Diggory, Prif Weithredwr Tai Gogledd Cymru:

Rydym yn hynod o falch o allu dod â’r cynllun hwn i’r ddinas, y cynllun cyntaf o’i fath ym Mangor. Mae’n darparu dewis amgen pwysig i aelodau hŷn ein cymuned wrth iddyn nhw ystyried eu hopsiynau tai.

I lawer o bobl hŷn, gall cyfleoedd byw gael eu cyfyngu o un pen y sbectrwm i’r pen arall, o fyw’n annibynnol llawn i ofal preswyl neu nyrsio. Mae Gofal Ychwanegol yn pontio’r bwlch hwn ac yn cynnig dewis i bobl barhau i fyw’n annibynnol gyda chefnogaeth a gofal pan fo angen.”

Chwith i dde:

  • Ian Williams, Advent
  • Chris White Grwp K&C
  • Cynghorydd Ioan Thomas, Cyngor Gwynedd
  • Peter Gibson, Cadeirydd, Bwrdd Tai Gogledd Cymru
  • Prif Weinidog, Carwyn Jones
  • Paul Diggory, Prif Weithredwr Tai Gogledd Cymru

Diweddariad ar y Diwrnod Hwyl Tenantiaid

Am y 4 blynedd diwethaf rydym wedi cynnal Diwrnod Hwyl blynyddol gan estyn gwahoddiad i’n holl breswylwyr i’w fynychu. Eleni, ar ôl ymgynghori gyda thenantiaid a staff, rydym wedi gwneud y penderfyniad i beidio a’i gynnal.

Daw’r penderfyniad hwn ar ôl adolygu diwrnodau hwyl blaenorol, gan edrych ar adborth a gwrando ar farn yn ystod yr ymgynghori ar y Strategaeth Cyfranogiad Tenantiaid. Oherwydd ein hardal ddaearyddol eang mae hefyd yn anodd dod o hyd i leoliad addas sy’n hwylus i’r rhan fwyaf o breswylwyr.

Beth sy’n mynd i ddigwydd yn lle’r diwrnod hwyl?

  • Byddwn yn darparu mwy o gyfleoedd i denantiaid i ddweud eu dweud
  • Bydd digwyddiadau a gweithgareddau llai, mwy lleol yn cael eu cynnal dros y flwyddyn gyfan
  • Byddwn yn darparu cyngor a chefnogaeth i breswylwyr a grwpiau cymunedol
  • Byddwn yn cefnogi cymunedau sydd am gynnal eu digwyddiadau a’u gweithgareddau eu hunain
  • Byddwn yn darparu mwy o gyfleoedd i denantiaid wella eu sgiliau a chael mynediad at hyfforddiant

Byddwn yn cynnig grant Datblygiad Personol er mwyn helpu i fynd i’r afael â rhwystrau ariannol a allai atal preswylwyr rhag cael mynediad i addysg, hyfforddiant neu gyflogaeth

Os hoffech gael rhagor o wybodaeth am ymgysylltu â thenantiaid a’r dulliau y gallwch eu defnyddio i gymryd rhan, cysylltwch ag Iwan Evans ar 01492 563232 neu anfonwch e-bost at [email protected]

Gallwch ddarllen mwy am ymgysylltu â thenantiaid yn ein Strategaeth Cyfranogiad Tenantiaid Lleol

Ddigwyddiad Ynni am ddim

Dewch i Ddigwyddiad Ynni am ddim yng Ngwesty’r Eagles, Llanrwst ar Ddydd Gwener, 10 Gorffennaf (10am – 3pm).

Cewch gyngor a chymorth am ddim ar sut i wneud eich cartref yn fwy ynni effeithlon ac arbed arian ar eich biliau tanwydd

Lawrlwythwch

Byw yn Annibynnol – gêm fwrdd newydd yn adlewyrchu materion bywyd go iawn sy’n wynebu pobl ifanc

Mae gêm fwrdd newydd sbon wedi cael ei lansio sy’n amlygu realiti byw’n annibynnol i bobl ifanc yng ngogledd Cymru. Mae’r gêm wedi ei datblygu gan bobl ifanc sydd wedi cael profiad go iawn o’r anawsterau sy’n ymwneud â byw’n annibynnol a digartrefedd.

Sefydlwyd y gêm fwrdd ‘Byw yn Annibynnol’, a gefnogir gan Tai Gogledd Cymru, Grŵp Cynefin, Cartrefi Conwy a Phrosiect Bus Stop, o daflen wybodaeth a grëwyd i helpu pobl ifanc i ddysgu am sgiliau bywyd fel rheoli cyllideb a chostau byw.

Teimlai’r bobl ifanc oedd y tu ôl i ddatblygu’r gêm bod natur ryngweithiol gêm fwrdd yn ffordd hwyliog o gael pobl i siarad am y materion allai eu poeni wrth ddysgu am wirioneddau digartrefedd yr un pryd.

Gan ddod ar faterion yma’n fyw, cynhaliwyd gwaith ymchwil a sylweddoli bod yr elfen ryngweithiol o chwarae gêm fwrdd yn fwy buddiol i bobl ifanc na dilyn y llwybr arall, o greu gêm ddigidol.

Bydd y gêm a ddatblygwyd gan Rwydwaith Tai Ieuenctid, ar gael ar gyfer ysgolion a grwpiau cymunedol yng Nghonwy a Sir Ddinbych i’w ddefnyddio fel adnodd dysgu effeithiol.

Yn ôl Gemma Closs-Davies, Cydlynydd Prosiect Digartrefedd Ieuenctid:

Mae Byw yn Annibynnol yn debyg i’r gêm fwrdd Monopoly mewn sawl ffordd. Rydych yn teithio o gwmpas y bwrdd gan godi cerdyn sefyllfa wahanol a rhyngweithio. Mae gennych bedwar diwrnod pan fydd eich cyflog yn cyrraedd a phedwar diwrnod i dalu biliau yn ystod y gêm, ac mae angen i chi reoli eich arian i sicrhau bod gennych ddigon o arian i fynd â chi o gwmpas y bwrdd.

Cyn lansio’r gêm, rydym wedi cynnal nifer o sesiynau peilot i brofi’r gêm ac rydym wedi cael adborth cadarnhaol iawn gan bobl ifanc sydd wedi ei ddefnyddio.

Gan fod y gêm wedi cael ei datblygu gan bobl ifanc sydd wedi cael profiadau go iawn o’r problemau hyn, mae’n cynnwys sefyllfaoedd realistig all gael eu defnyddio fel pynciau trafod. Mae’r digwyddiadau a grëwyd o fewn y gêm yn adlewyrchu’r hyn all ddigwydd mewn bywyd go iawn.”

Dywedodd Iwan Evans, Cydlynydd Cyfranogiad Tenantiaid yn Nhai Gogledd Cymru, sydd wedi bod yn cymryd rhan yn y prosiect:

“Mae Tai Gogledd Cymru yn falch iawn o fod yn rhan o’r prosiect hwn. Mae ein tenantiaid hefyd wedi mwynhau cymryd rhan, ac wedi defnyddio eu profiad personol i helpu i ddatblygu’r gêm. Rydym yn gobeithio bydd y gêm fwrdd yn mynd ymlaen i fudd i lawer o bobl ifanc.”

“Mae’r bobl ifanc dan sylw, aelodau’r Rhwydwaith Tai Pobl Ifanc, hefyd yn datblygu gwefan sy’n darparu gwybodaeth hanfodol i bobl ifanc sydd yn meddwl am fyw yn annibynnol.”

Cafodd y gêm ei lansio yn TAPE, Bae Colwyn lle datgelwyd gêm enfawr sydd wedi ei greu a’i osod ar y llawr.

Os ydych yn chwilio am wybodaeth ynglŷn â’r gêm fwrdd ‘Byw yn Annibynnol’, neu i gael manylion am gymorth ar gyfer pobl ifanc sy’n wynebu digartrefedd, cysylltwch ag Iwan Evans ar 01492 563232.

Mae’r Rhwydwaith Tai Pobl Ifanc yn recriwtio ar gyfer aelodau newydd ac maent yn cwrdd yn Nhŷ Hapus yn Llandudno ar ddydd Mawrth 14 Gorffennaf am 5pm. Lawr lwythwch daflen yma

 

Lesley Griffiths AC yn agos yn swyddogol cynllun Gofal Ychwanegol Hafod y Parc, Abergele

Mae cynllun Gofal Ychwanegol arloesol Tai Gogledd Cymru yn Hafod y Parc wedi cael ei agor yn swyddogol gan Lesley Griffiths AC, y Gweinidog Cymunedau a Threchu Tlodi, ar ddydd Iau 20 Tachwedd, 2014.

Mae Hafod y Parc yn gynllun Gofal Ychwanegol newydd gwerth £11 miliwn yn Rhodfa Cinmel sy’n cynnig dewis gwell i bobl dros 60 oed, gan ddarparu byw’n annibynnol gyda rhaglen gofal a chefnogaeth y gellir ei haddasu a’i hasesu wrth i’w hanghenion unigol newid. Mae’r cynllun wedi derbyn dros £6m oddi wrth Raglen Grant Tai Cymdeithasol Llywodraeth Cymru.

Daeth preswylwyr, staff a gwesteion ynghyd i ddathlu agoriad swyddogol y cynllun wrth i Lesley Griffiths AC ddadorchuddio plac i nodi’r achlysur. Cafodd te prynhawn ei weini a chafwyd perfformiadau gan Gôr Ysgol Glan Morfa, yr ysgol leol hefyd.

Manteisiodd y gwesteion ar y cyfle i fynd o amgylch cyfleusterau safonol gwych Hafod y Parc. Mae’r safle wedi’i leoli o fewn parcdir coediog deiliog hardd, ac mae’r cynllun yn cynnwys llu o ardaloedd cymunedol modern ond cartrefol, gan gynnwys sawl lolfa; bwyty; siop trin gwallt ac ystafell driniaeth maldod; ystafell snwcer a gemau; ystafell TG a llawer mwy.

Cwblhawyd y gwaith adeiladu yn Ebrill 2014 ac mae pob un o’r 49 flat un a dwy ystafell wely wedi cael eu llenwi. Mae’r preswylwyr wedi ymgartrefu’n gyflym yn eu cartrefi newydd, gan sefydlu nifer o weithgareddau cymdeithasol a hyd yn oed yn ffurfio band preswyl.

Dywedodd Betty Fraser, un o breswylwyr Hafod y Parc:

“Hafod y Parc yw’r lle gorau i mi fyw ynddo erioed, nid wyf erioed wedi teimlo mor hapus a bodlon yn fy mywyd. Mae yma fwyd bendigedig a chefnogaeth ddiamod gan y staff, mae’n anhygoel! “

Dywedodd Lesley Griffiths, y Gweinidog Cymunedau a Threchu Tlodi:

“Rwy’n falch iawn fod Llywodraeth Cymru wedi gallu cefnogi’r cyfleuster yma yn Hafod y Parc a fydd yn gwneud gwahaniaeth gwirioneddol i fywydau pobl, ac a fydd yn helpu i amddiffyn pobl rhag cael eu hynysu neu fod yn unig.”

“Mae cynlluniau fel hyn yn cefnogi ystod o anghenion tai ac rwyf wedi cyfarfod â nifer o breswylwyr heddiw sydd i gyd yn hynod o fodlon gyda’u cartrefi newydd.”

“Mae’r buddsoddiad yma nid yn unig wedi darparu cartrefi sydd eu dirfawr angen, mae hefyd wedi cefnogi’r economi drwy roi hwb i swyddi a thwf economaidd a darparu cyfleoedd hyfforddi i bobl leol.”

Ychwanegodd Paul Diggory, Prif Weithredwr Tai Gogledd Cymru:

“Rydym mor falch o Hafod y Parc, mae’n gynllun eithriadol ac mae’n hawdd gweld apêl y datblygiad.”

“Mae pobl hŷn yn haeddu mwy o ddewis yn eu blynyddoedd diweddarach ac mae Hafod y Parc yn cynnig dewis amgen atyniadol iawn i fywyd cartref a gofal preswyl. I ni, mae Gofal Ychwanegol yn golygu galluogi pobl i wneud dewisiadau tai a gofal ystyriol gyda rhyddid hyblygrwydd wrth i’w hanghenion newid.”

Sgwrs Facebook: Gofynnwch i ein Prif Weithredwr

A oes ganddo’ch chi gwestiwn yr ydych yn ysu i’w ofyn i Brif Weithredwr Tai Gogledd Cymru, Paul Diggory? Unrhyw beth rydych eisiau gwybod am Dai Gogledd Cymru?

Dyma eich cyfle i ofyn. Bydd Paul yn cymryd y llwyfan ac yn cynnal sgwrs Facebook fyw ar Ddydd Iau 27 Tachwedd o 1:30yp – 2:30yp.

Byddwch yn gallu postio eich cwestiynau i Paul ar ein tudalen Facebook neu drwy anfon neges breifat uniongyrchol ar Ddydd Iau 27 Tachwedd o 1:30yp – 2:30yp. Ddim yn gallu mynychu’r sgwrs? Gyrrwch neges i ni o flaen llaw a byddwn yn gwneud ein gorau i ateb eich cwestiynau.

Prosiect ffilm Tenantiaid tro cyntaf ar y sgrin fawr

Cafodd ffilm a gynhyrchwyd gan denantiaid Tai Gogledd Cymru am hanes Clwb Pêl-droed Bwrdeistref Conwy ei ddangosiad cyntaf gerbron cynulleidfa ddethol ar ddydd Sul 19 Hydref, 2014.

Roedd y dangosiad yn rhan o ddiwrnod hwyl a drefnwyd gan y clwb pêl-droed. Diolchodd Rheolwr Cyffredinol y Clwb Tony Thomas ac Is-gadeirydd Darren Cartwright tenantiaid TGC a TAPE Cymunedol a Ffilm, a hwylusodd y ffilmio cyn perfformiadau cyntaf y ffilm i’r gwylwyr ar y sgrin fawr.

Mae’r ffilm yn dilyn hanes y Clwb o’i ddechreuad yn 1977, a’i hynt oddi ar hynny hyd heddiw gan gynnwys datblygiad diweddar adeilad newydd i’r clwb. Mae’r tenantiaid wedi bod ynglŷn â phob cam o’r broses gynhyrchu o’r cynllunio gwreiddiol a chreu bwrdd stori, i’r ffilmio, cyfweld, sain a goleuo, golygu a chynhyrchu.

Gallwch wylio y film yma:

Os hoffech chi gymryd rhan mewn prosiect o’r fath yn y dyfodol, cysylltwch ag Iwan Evans ar: [email protected]

Llond gwlad o hwyl haf

Mae Tai Gogledd Cymru wedi cynnal ei Diwrnod Hwyl yr Haf blynyddol gyda thenantiaid o bob cwr o Wynedd a Chonwy yn dod ynghyd i gymryd rhan yn y diwrnod cymunedol am ddim .

Cynhaliwyd y digwyddiad yn Ysgol Morfa Rhianedd, Ffordd Cwm, Llandudno, lle cafodd y gwesteion fwynhau llu o weithgareddau yn cynnwys paentio wynebau, celf a chrefft, helfa drysor, ardal chwarae a gardd. Bu cymeriadau Disney yn diddanu’r plant a chafwyd cerddoriaeht fyw gan grŵp lleol y Ghostbuskers.

Cafodd cinio am ddim a chludiant am ddim eu trefnu i hebrwng preswylwyr yn ôl a blaen o’u cartrefi ac fe wnaeth yr haul dywynnu drwy’r prynhawn ar gyfer yr holl westeion.

Dywedodd Iwan Evans o Tai Gogledd Cymru:

“Rydym wedi cael ymateb rhagorol gan denantiaid a ddaeth draw i fwynhau’r diwrnod sydd yn wych. Mae hwn yn ddiwrnod pwysig yng nghalendr Tai Gogledd Cymru. Mae nid yn unig yn ddiwrnod llawn hwyl, ond mae hefyd yn rhoi cyfle i bawb sgwrsio â phobl o fewn eu cymunedau ac o drefi eraill cyfagos.”

Roedd aelodau o dîm Tai Cymru Gogledd hefyd wrth law i gynnig cymorth a chyngor ynghylch unrhyw agwedd o’u tenantiaeth. Roedd gwybodaeth o sefydliadau partner eraill, gan gynnwys yr Undeb Credyd, Crest, Bus Stop ac ailgylchu Cyngor Conwy hefyd ar gael ar y diwrnod.