Rydym yn chwilio am aelod y Bwrdd sydd gyda’r sgiliau a’r profiad i gryfhau ein Bwrdd. Mae’r rhain yn cynnwys trawsnewid gwasanaeth cwsmer mewn amgylchedd sector tai; Datblygu eiddo/ rheoli asedau a dealltwriaeth o bartneriaethau Strategol gyda sefydliadau eraill ac ymgysylltu â’r gymuned neu wybodaeth o sialensau systematic gyda chymunedau lleol. Rydym yn chwilio am rywun sydd yn byw yng Nghymru ac yn ddelfrydol yn siaradwr Cymraeg.

Os yw hynny’n taro tant gyda chi ac os ydych yn rhannu ein huchelgais, yna hoffem glywed gennych. Gallwch ffeindio allan mwy am ddod yn aelod o’r Bwrdd yma.

Fe’ch gwahoddir i gwblhau a dychwelyd Ffurflen Gais a Ffurflen monitro Cyfleoedd Cyfartal i [email protected] erbyn 12yp ar Ddydd Gwener 29 Mawrth.

Mae grŵp o chwe asiantaeth tai lleol wedi dod at ei gilydd mewn menter ar y cyd cyffrous i gyflymu datblygiad tai fforddiadwy newydd i gefnogi dosbarthiad Bargen Twf Gogledd Cymru.

Y Fargen Twf yw ymrwymiad rhanbarth Gogledd Cymru i gydweithio er mwyn hwyluso a chyflymu twf economaidd. Roedd £120 miliwn o gyllid wedi cael ei rhoi i’r Fargen yng Nghyllideb 2018 a gafodd ei chyhoeddi mis Hydref. Mae’r Fargen yn anelu defnyddio cyllid gan y llywodraeth i sianelu bron i £700m o arian cyhoeddus a phreifat i gyfres o brosiectau sydd wedi eu hanelu at hybu economi’r Gogledd a chreu miloedd o swyddi.

Mae Prif Weithredwyr o’r 6 Asiantaeth Tai sy’n gweithredu ar draws gogledd Cymru, gan gynnwys Pennaf, Cartrefi Conwy, Cartrefi Cymunedol Gwynedd, Grŵp Cynefin, Tai Wales & West a Tai Gogledd Cymru yn cydweithio ar sail wirfoddol gyda chydweithwyr o’r chwe Awdurdod Lleol. Mae’r grŵp yn ystyried sut y gallant weithio gyda’i gilydd yn rhagweithiol i ddatblygu mwy o dai gan ddatgloi safleoedd strategol lle mae datblygiad wedi arafu neu stopio ar draws gogledd Cymru, sydd wedi cael eu dyrannu mewn Cynllun Datblygu neu lle mae hawl cynllunio wedi cael ei roi. Bydd datblygiadau fel y rhain yn adlewyrchu’r farn leol ac yn ymateb i ddymuniadau cymunedol i weld mwy o dai fforddiadwy fel bod pobl ifanc a theuluoedd yn medru byw yn yr ardal.

Eglurodd Helena Kirk, Prif Weithredwr Tai Gogledd Cymru:

“Nid yw’r lefel yma o gydweithio arloesol rhwng y cymdeithasau rhanbarthol wedi cael ei ddatblygu na’i chyflawni yng Nghymru cyn hyn.

Mae’n gyfle cyffrous i’r grŵp o chwech asiantaeth leol wneud cyfraniad strategol i’r economi drwy’r cynlluniau i gyflymu twf tai a chyflawni ystod o anghenion tai ar draws y rhanbarth.

Trwy gydweithio, bydd yr asiantaethau yn cefnogi’r Fargen Twf i gyflymu twf tai a chreu mwy o dai fforddiadwy ar draws gogledd Cymru. Trwy gydweithio, gellir defnyddio capasiti ein sefydliadau ar y cyd i dorri rhwystrau lawr ac i ddosbarthu tai ar leoliadau heriol.” 

Dywedodd Rebecca Evans, y Gweinidog Dros Tai ac Adfywiad:

“Mae hwn yn gyfle cyffrous i greu mwy o dai fforddiadwy ar gyfer pobl yng ngogledd Cymru. Trwy gydweithio, mae’r potensial gan y fenter hon i fod yn llawer mwy na’r hyn y gallai’r asiantaethau tai ei gyflawni ar eu pennau eu hunain, ac rydym yn edrych ymlaen at gynorthwyo ei datblygiad.”

Mae cynlluniau’r grŵp ar gyfer y dyfodol yn cael eu datblygu i gyd-fynd gyda blaenoriaethau Llywodraeth Cymru a’r Awdurdod Lleol.

Mae Tai Gogledd Cymru wedi datblygu Cynllun Corfforaethol newydd a fydd yn cwmpasu’r cyfnod 2018-2021.

Diolch yn fawr i bawb a gymerodd ran yn yr ymgynghoriad a arweiniodd at ddatblygu’r cynllun hwn.

Mae’r Cynllun Corfforaethol yn nodi ein blaenoriaethau a’n hamcanion ar gyfer y tair blynedd nesaf.  Bydd hyn yn cwmpasu ein tenantiaid, ein cartrefi, gwydnwch ariannol a datblygiad staff.

Gallwch ddarllen copi o’r Cynllun Corfforaethol yma.

Mae Tai Gogledd Cymru wedi cyhoeddi penodiad Tom Murtha fel Cadeirydd newydd ei Bwrdd Grŵp yn ei Chyfarfod Cyffredinol Blynyddol a gynhaliwyd ym mis Medi eleni.

Mae Tom yn olynu Peter Gibson fel ein Cadeirydd, a safodd i lawr eleni ar ôl 9 mlynedd ar y Bwrdd, sef y cyfnod hiraf posib a ganiateir i fod yn aelod o’r Bwrdd.

Helena Kirk, Prif Weithredwr Tai Gogledd Cymru:

“Hoffem ddiolch i Peter am ei flynyddoedd lawer o wasanaeth fel aelod gwirfoddol o’r Bwrdd dros Tai Gogledd Cymru. Mae Peter wedi gweld llawer o newidiadau dros y blynyddoedd ac wedi bod yn rhan o’r gwaith gwych rydym wedi’i wneud mewn cymunedau lleol.”

Mae Tom Murtha yn dod â phrofiad helaeth iawn gydag ef, gan iddo dreulio dros 40 mlynedd yn y sector tai a gofal. Dechreuodd ei yrfa fel gweithiwr cymunedol yng nghanol dinas Caerlŷr ac ymddeolodd fel Prif Weithredwr Midland Heart, un o sefydliadau tai a gofal mwyaf y DU, yn 2012.

Tom Murtha, Cadeirydd Grŵp newydd yn Tai Gogledd Cymru:

“Rwy’n falch iawn o ymuno â Helena a’i chydweithwyr yn Tai Gogledd Cymru ar yr adeg bwysig hon. Rwyf bob amser wedi edmygu eu gwaith a gwaith y sector tai yng Nghymru sy’n dal i gydnabod gwir werthoedd a phwrpas tai cymdeithasol.”

Helena Kirk, Prif Weithredwr Tai Gogledd Cymru:

“Rydym yn falch iawn o groesawu Tom fel ein Cadeirydd newydd. Teimlwn ei fod yn gaffaeliad gwych i’r sefydliad a bydd yn allweddol wrth oruchwylio gweithrediad ein Cynllun Corfforaethol newydd a chyfeiriad Tai Gogledd Cymru at y dyfodol.”

Gallwch wybod mwy am Tom ac aelodau eraill Bwrdd Tai Gogledd Cymru yma.

Mae Adolygiad Blynyddol Tai Gogledd Cymru yn edrych yn ôl ar y flwyddyn sydd wedi bod, yn ein hatgoffa o’r hyn rydym wedi cyflawni.

Gallwch ddarllen yr Adolygiad Blynyddol ar gyfer 2016 – 2017 yma.

Beth yw eich barn? Gadewch i ni wybod beth yw eich barn am Adolygiad Blynyddol eleni drwy anfon e-bost at [email protected].