News Categories: Datblygu

Cartrefi newydd yn cefnogi adfywio Caergybi

Mae Garreg Domas, datblygiad tai newydd gan Tai Gogledd Cymru wedi cael ei gwblhau yn gynnar gan ddarparu 9 o gartrefi newydd mawr eu hangen yng Nghaergybi.

Mae’r datblygiad fflatiau wedi ei leoli yng nghanol tref Caergybi ar hen safle cwt sgowtiaid a gafodd ei ddymchwel. Mae’r datblygiad wedi creu 9 o fflatiau un ystafell wely dau berson.

Derbyniodd y preswylwyr eiddgar eu goriadau a symud i mewn i’w cartref newydd ar ddechrau mis Mawrth.

Dywedodd Helena Kirk, Prif Weithredwr Tai Gogledd Cymru:

“Rydym yn hynod o falch efo Garreg Domas, sy’n ddatblygiad ar y cyd gyda Chyngor Sir Ynys Môn. Roedd y datblygiad i fod i gael ei gwblhau ar 30 Mehefin 2017, felly fe’i cwblhawyd yn gynt na’r disgwyl.”

“Mae’r datblygiad wedi elwa o gyllid grant Lleoedd Llewyrchus Llawn Addewid, gan gefnogi adfywio Caergybi ac adeiladu mwy o gartrefi newydd ar gyfer yr ardal.”

Dywedodd Pennaeth Gwasanaethau Tai yng Nghyngor Sir Ynys Môn, Shan Williams:

“Roeddem yn falch o weithio mewn partneriaeth â Tai Gogledd Cymru ar y prosiect hwn i ddarparu tai cymdeithasol newydd ar gyfer Ynys Môn a gwneud defnydd o safle tir llwyd gwag yn agos at ganol tref Caergybi. Rydym yn ddiolchgar i Lywodraeth Cymru am ddarparu cronfeydd cyfalaf Lleoedd Llewyrchus Llawn Addewid er mwyn helpu i wneud y cynllun yn bosibl.”

“Hyd yma mae Rhaglen Lleoedd Llewyrchus Llawn Addewid Caergybi ar gyfer adfywio a chartrefi wedi cefnogi adeiladu 40 o gartrefi rhent cymdeithasol newydd trwy weithio mewn partneriaeth â chymdeithasau tai lleol a’r Is-adran Tai a Lleoedd Llywodraeth Cymru.”

Datblygiad tai cydweithredol trefol cyntaf Cymru yn agor yn swyddogol

Ar 13eg o  Ionawr agorwyd ‘Datblygiad Tai Afallon’, a adeiladwyd gan y fenter Tai Cymunedol Cydweithredol trefol gyntaf yng Nghymru, yn swyddogol gan Nic Bliss, Cadeirydd y Cydffederasiwn Tai Cydweithredol.

Sefydlwyd Menter Tai Cydweithredol Gorllewin y Rhyl, gan Ymddiriedolaeth Tir Cymunedol Gorllewin y Rhyl a Tai Gogledd Cymru, i ddatblygu cymuned newydd wedi ei grymuso yng nghalon ardal adfywio Gorllewin y Rhyl.

‘Datblygiad Tai Afallon’, gyferbyn â pharc Gerddi Heulwen, yw datblygiad cyntaf y fenter gydweithredol, gan greu cartrefi newydd ar gyfer 11 o deuluoedd, cyplau ac unigolion lleol.

Yn cynnwys 7 o dai teuluol wedi eu hadeiladu o’r newydd a 4 fflat wedi eu hadnewyddu’n llwyr, symudodd y 7 teulu cyntaf yn symud i mewn i’r datblygiad tai ar ddiwedd mis Hydref 2016, ac ers hynny maent wedi mwynhau eu Nadolig cyntaf yn eu cartrefi newydd. Mae’r 4 teulu sy’n weddill wedi symud i mewn i’w fflatiau newydd y mis hwn; sy’n ffordd wych o ddechrau’r Flwyddyn Newydd.

Mae Tom Jones, un o’r preswylwyr a Chadeirydd Pwyllgor Preswylwyr Afallon yn hapus gyda’i gartref newydd:

“Mae hwn yn gyfle anhygoel i symud i eiddo newydd sbon a chael llais yn y ffordd y caiff ei reoli. Mae Gorllewin y Rhyl bob amser wedi bod yn lle gwych i fyw ynndo a rŵan gallwn edrych ymlaen at adeiladu cymuned newydd sbon yn ei ganol.”

Dywedodd Fiona Davies, Cadeirydd Ymddiriedolaeth Tir Cymunedol Gorllewin y Rhyl:

“Mae Datblygiad Tai Afallon yn gynllun hynod bwysig yng Ngorllewin y Rhyl. Mae’n benllanw 6 mlynedd o waith caled gan wirfoddolwyr ac aelodau o’r gymuned, i greu Ymddiriedolaeth Tir Gorllewin y Rhyl, datblygu partneriaeth gyda Tai Gogledd Cymru ac wedi hynny y fenter Tai Cydweithredol newydd.”

“Roedd dyheadau’r gymuned yn cynnwys cael tai o ansawdd gwell yn yr ardal a dyna’n union sydd wedi ei gyflawni.”

Ychwanegodd Nikki Jones, Cyfarwyddwr Ymddiriedolaeth Tir Cymunedol Gorllewin y Rhyl:

“Mae hon yn eiliad o falchder i’r rhai hynny ohonom sydd wedi ymdrechu i sicrhau bod y datblygiad hwn yn digwydd. Mae ein Bwrdd Cymunedol wedi bod yn ymroddedig i gynhyrchu canlyniad cadarnhaol ar gyfer Gorllewin y Rhyl, ac mae eu hymroddiad bellach wedi talu ar ei ganfed.”

Dywedodd Helena Kirk, Prif Weithredwr Tai Gogledd Cymru:

“Mae Afallon yn ddatblygiad tai unigryw ac mae Tai Gogledd Cymru yn falch o fod yn rhan o’r prosiect. Mae’r datblygiad wedi rhagori ar ein disgwyliadau ac mae’r tai yn enghraifft wych o sut y byddai tai wedi edrych yn yr ardal.”

“Mae’r model cydweithredol wedi gweithio’n dda ac rydym yn falch bod yna eisoes ymdeimlad o gymuned ar y stryd; ac heb amheuaeth mae’r diolch am hynny i’r fenter gydweithredol.”

Dywedodd Dave Palmer, rheolwr prosiect Tai Cydweithredol yng Nghanolfan Cydweithredol Cymru:

“Bydd galluogi pobl leol i wneud penderfyniadau am eu cartrefi yn gwneud gwahaniaeth enfawr a chadarnhaol i iechyd a lles ein cymunedau yn y dyfodol. Oherwydd eu natur, mae mentrau tai cydweithredol yn fwy cydweithredol a democrataidd, ac maent yn annog a chefnogi rheolaeth gan y gymuned leol ar eu cymdogaethau cyfagos.

“Mae rhaglen Tai Cydweithredol Cymru wedi dangos i ni bod tai cydweithredol yn ddigon hyblyg i ddiwallu llawer o anghenion a phob math o ddeiliadaeth. Yng Nghanolfan Cydweithredol Cymru, rydym yn gweithio i sicrhau bod tai cydweithredol yn darparu cyfran sylweddol o’r 20,000 o gartrefi fforddiadwy newydd fydd yn cael eu hadeiladu yn ystod y tymor Llywodraeth Cymru hwn.”

Mae mentrau tai cydweithredol yn rhoi mwy o lais i denantiaid ar faterion o ddydd i ddydd sy’n gallu effeithio ar ansawdd eu bywydau. Gallai materion gynnwys penodi contractwyr cynnal a chadw, pennu taliadau gwasanaeth, dyrannu tai i denantiaid newydd sy’n ymuno â’r gymuned a threfnu digwyddiadau.

I gael eu hystyried i fod yn rhan o’r fenter gydweithredol, roedd gofyn i denantiaid posib fod wedi byw, gweithio neu wirfoddoli yn y Rhyl am o leiaf ddwy o’r pum mlynedd diwethaf a chawsant eu hasesu ar eu haddasrwydd yn erbyn meini prawf allweddol.

Dywedodd Ysgrifennydd y Cabinet dros Gymunedau a Phlant, Carl Sargeant:

“Mae datblygiad Afallon yn enghraifft wych o sut y mae Llywodraeth Cymru yn cyflawni ei hymrwymiad i ddarparu tai fforddiadwy o safon uchel, ac rwy’n falch bod tenantiaid eisoes yn mwynhau eu cartrefi newydd.

“Mae’r prosiect hwn yn elfen allweddol o Raglen Gwella Tai Gorllewin y Rhyl, sy’n cael ei harwain gan fuddsoddiad o bron i £17m gan Lywodraeth Cymru er mwyn gwella tai a darparu mannau gwyrdd yn yr ardal a fydd yn hanfodol o ran cyfrannu at adfywio’r dref.”

I gloi dywedodd Helena Kirk:

“Rydym yn gobeithio y bydd preswylwyr yn mwynhau byw yn eu cartrefi newydd ac edrychwn ymlaen at weld eu hysbryd cymunedol yn parhau.”

Maes parcio yn gwneud lle i 12 o gartrefi fforddiadwy newydd

Agorwyd datblygiad tai fforddiadwy newydd Clos Owen yn Wrecsam yn swyddogol mewn digwyddiad ar ddydd Gwener 4 Tachwedd 2016.

Mae’r datblygiad tai cymdeithasol £1.5 miliwn yn nodi’r cyntaf ar gyfer Tai Gogledd Cymru yn Wrecsam, gan wneud yn siŵr bod y gymdeithas yn byw yn ôl ei enw ‘Tai Gogledd Cymru’.

Gan weithio’n agos gyda Chyngor Sir Wrecsam mae cymdeithas tai Gogledd Cymru wedi creu 12 o dai rhent fforddiadwy newydd yn ardal Whitegate y dref ar safle hen faes parcio.

Plannwyd coeden addurnol i nodi’r achlysur cyn cyfarfod trigolion dros de prynhawn.

Meddai Phil Danson, Cyfarwyddwr Llefydd yn Tai Gogledd Cymru:

“Mae hon yn enghraifft ardderchog o sut mae Tai Gogledd Cymru yn gweithio gyda’u partneriaid i ddatblygu tai fforddiadwy newydd yng Ngogledd Cymru. Drwy weithio’n agos mewn partneriaeth gyda Chyngor Wrecsam rydym wedi gwella rhagolygon tai i deuluoedd ifanc lleol a mynd i’r afael â’r mater ehangach o brinder tai.”

“Rydym yn gobeithio y bydd y tenantiaid yn mwynhau byw ar eu stad newydd am flynyddoedd i ddod, ac y byddant yn cymryd pob cyfle i gyfrannu at eu cymuned.”

Symudodd trigolion i’w cartrefi newydd ym mis Gorffennaf 2016 ac maent wedi ymgartrefu’n dda.

Dyweddod un o’r preswylwyr Julie Jones:

“Rwy’n hapus iawn gyda fy nghartref newydd. Symudais yma o Llai a dwi’n hapus iawn gydag ansawdd y tŷ newydd. Mae yna ddigon o le ynddo, mae yna baneli solar sydd eisoes wedi arbed arian i mi ar filiau gwresogi, mae popeth yn lân ac yn fodern ac yn hawdd i’w defnyddio ac mae digon o le storio. Gallaf gyrraedd canol y dref o fewn ychydig funudau ar droed rŵan felly mae’n ddelfrydol i mi.”

Dywedodd yr Aelod Lleol ar gyfer Whitegate, y Cyng Brian Cameron:

“Mae hwn yn ddatblygiad cadarnhaol iawn ar gyfer tai yn yr ardal.  Rwy’n falch iawn hefyd fod dau o’r fflatiau llawr gwaelod un ystafell wely wedi cael eu hadeiladu gydag addasiadau ar gyfer preswylwyr sydd ag anghenion penodol. Mae partneriaeth y cyngor gyda Tai Gogledd Cymru wedi gweithio’n dda iawn yma ac, o ganlyniad, rydym wedi gallu creu eiddo dymunol iawn ac rwy’n siŵr y bydd y preswylwyr newydd yn hapus iawn gyda nhw.”

Dywedodd yr Aelod Arweiniol dros Dai, y Cynghorydd Ian Roberts:

“Rydym wedi gwneud cynnydd gwych gyda datblygu tai fforddiadwy yn Wrecsam yn ddiweddar, diolch i nifer o gynlluniau sydd ar y gweill ar draws y Fwrdeistref Sirol. Rwyf wrth fy modd bod y cartrefi modern, atyniadol hyn wedi eu cwblhau yn Clos Owen ac mae’n wych gweld bod y bartneriaeth rhwng y Cyngor a Tai Gogledd Cymru wedi cael canlyniadau mor gadarnhaol yma.”

Agor datblygiad tai fforddiadwy newydd yn swyddogol

Daeth preswylwyr, staff a gwesteion ynghyd i ddathlu agoriad swyddogol datblygiad tai fforddiadwy newydd Stad yr Ysgol yn Bryn Paun, Llangoed ar ddydd Gwener 21 Hydref, 2016.

Gan weithio’n agos gyda Chyngor Sir Ynys Môn, mae datblygiad tai newydd Stad yr Ysgol wedi’i adeiladu yn ardal Bryn Paun pentref Llangoed, yn agos at yr ysgol gynradd leol.

Mae’r safle wedi cael ei weddnewid gan Tai Gogledd Cymru a’r contractwyr dynodedig Williams Homes Bala, gan ddarparu 10 o dai fforddiadwy sydd eu dirfawr angen, sef cymysgedd o 8 tŷ pum person x tair ystafell wely a 2 dŷ pedwar person x dwy ystafell wely.

Mi wnaeth Lynne Parry, Cadeirydd Bwrdd Gwasanaethau Landlord Tai Gogledd Cymru, a’r cynghorydd lleol Lewis Davies helpu i blannu coeden addurnol i nodi’r achlysur cyn mwynhau te prynhawn gyda pherfformiadau gan blant yr ysgol leol, Ysgol Llangoed.

Eglurodd Phil Danson, Cyfarwyddwr Lleoedd gyda Tai Gogledd Cymru:

“Rydym yn hynod falch ein bod wedi creu 10 o dai rhent fforddiadwy newydd i bobl leol Llangoed. Mae hyn yn ganlyniad partneriaeth wych gyda Chyngor Sir Ynys Môn. Trwy weithio gyda’n gilydd rydym wedi gwella’r rhagolygon tai i deuluoedd ifanc lleol a helpu i fynd i’r afael â mater ehangach prinder tai.”

Dywedodd Pennaeth Gwasanaethau Tai Ynys Môn, Shan Lloyd Williams:

“Mae’r Cyngor wedi gweithio’n agos gyda Llywodraeth Cymru a Tai Gogledd Cymru i gyflenwi’r cynllun tai fforddiadwy arloesol yma, mewn ardal lle canfyddwyd angen am dai fforddiadwy. Ein gobaith yw y bydd y tenantiaid yn mwynhau byw ar eu stad newydd am flynyddoedd i ddod, ac y byddant yn cymryd pob cyfle i gyfrannu at weithgareddau’r gymuned.

Dywedodd deilydd y portffolio Tai a Gwasanaethau Cymdeithasol, y Cynghorydd Aled Morris Jones:

“Dyma enghraifft wych arall o sut y mae Cyngor Sir Ynys Môn yn gweithio gyda’i bartneriaid i ddatblygu tai fforddiadwy newydd ar yr Ynys. Rydym yn gweithio’n rhagweithiol i ddatblygu tai fforddiadwy ychwanegol ar draws Ynys Môn, sy’n cynnwys adeiladu’r cartrefi Cyngor newydd cyntaf ers 30 mlynedd, dod ag eiddo gwag hir dymor yn ôl i ddefnydd ac yn ddiweddar diddymu’r Hawl i Brynu ar Ynys Môn.”

Ychwanegodd Phil Danson, Cyfarwyddwr Lleoedd gyda Tai Gogledd Cymru:

“Rydym yn gobeithio y bydd preswylwyr Stad yr Ysgol yn mwynhau byw yn eu cartrefi newydd ac y bydd y gymuned yn ffynnu ac yn tyfu ochr yn ochr â’r goeden newydd a blannwyd heddiw.”

Tai fforddiadwy newydd yn Wrecsam o ganlyniad i bartneriaeth newydd

Mae preswylwyr wedi cael eu croesawu i’w cartrefi newydd yr wythnos hon wrth i 12 o dai rhent fforddiadwy gael eu creu mewn datblygiad tai cymdeithasol gwerth £1.5 miliwn gan Tai Gogledd Cymru yn Wrecsam.

Gan weithio’n agos gyda Chyngor Sir Wrecsam, mae datblygiad newydd Clos Owen wedi cael ei adeiladu yn ardal Whitegate ar safle hen faes parcio yn y dref. Mae’r safle wedi cael ei weddnewid gan Tai Gogledd Cymru a’r contractwyr K&C Group, gan ddarparu 12 o gartrefi sydd eu dirfawr angen, sef 6 tŷ gyda 2 ystafell wely a 6 fflat gydag un ystafell wely.

Y datblygiad hwn yw un cyntaf Tai Gogledd Cymru yn Wrecsam, ac mae’n sicrhau bod y gymdeithas yn cyfiawnhau ei henw fel ‘Tai Gogledd Cymru’.

Meddai Phil Danson, Cyfarwyddwr Lleoedd, Tai Gogledd Cymru:

“Mae hon yn garreg filltir bwysig i Tai Gogledd Cymru, wrth i ni dyfu ac ehangu ymhellach. Drwy weithio mewn partneriaeth agos gyda Chyngor Wrecsam rydym wedi gwella’r rhagolygon tai i deuluoedd ifanc lleol a mynd i’r afael â mater ehangach prinder tai.”

Un o’r tenantiaid sydd wedi elwa o’r datblygiad newydd yw John Spruce. Mae John wedi symud i mewn i fflat sydd wedi cael ei addasu ar gyfer ei anghenion arbennig.

“Yn ddiweddar mi wnes i symud i mewn i un o’r fflatiau llawr gwaelod a addaswyd, ac rwy’n hapus iawn. Mae’n darparu ar gyfer fy holl anghenion yn dda iawn. Mae digon o ofod yma, cyfarpar da, ac mae popeth yno ar y lefel iawn i mi, gan gynnwys y gawod, popty, silffoedd, ac ati. Mi wnes i ofyn am gael eiddo i mi fy hun beth amser yn ôl ac mae’r cyngor yn ddiweddar wedi fy argymell i ar gyfer un o’r fflatiau newydd sbon yma felly rwy’n hapus dros ben.”

Dywedodd Aelod Arweiniol Cyngor Wrecsam dros Dai, y Cynghorydd Ian Roberts:

“Rwy’n falch iawn bod y cartrefi newydd yma wedi cael eu creu diolch i bartneriaeth lwyddiannus rhwng Tai Gogledd Cymru a Chyngor Wrecsam. Mae datblygu tai fforddiadwy yn chwarae rhan bwysig wrth fynd i’r afael â’r mater o brinder tai, ac rwy’n gobeithio y bydd y preswylwyr newydd yn falch iawn o’r eiddo yma.”

Dywedodd yr Aelod Lleol dros ardal Whitegate, y Cyng Brian Cameron, “Mae hwn yn ddatblygiad cadarnhaol iawn ar gyfer tai yn yr ardal. Rwy’n falch iawn fod dau o’r fflatiau un ystafell wely ar y llawr gwaelod wedi cael eu hadeiladu gydag addasiadau ar gyfer pobl hŷn ac anabl hefyd. Mae partneriaeth y Cyngor gyda Tai Gogledd Cymru wedi gweithio’n dda iawn yma ac rwy’n edrych ymlaen at adeiladu ar y berthynas yma.”

Mae datblygiad arall eisoes ar y gweill gan Tai Gogledd Cymru a Chyngor Wrecsam.

Cartrefi newydd yn cynnig dyfodol newydd i bobl leol Y Rhyl

Mae chwech o drigolion lleol yn elwa o gartrefi newydd sydd wedi cael eu hailddatblygu i’w rhentu diolch i bartneriaeth rhwng Tai Gogledd Cymru ac Ymddiriedolaeth Tir Cymunedol Gorllewin y Rhyl.

Mae’r eiddo ar John Street yng Ngorllewin y Rhyl, a fu cyn hyn yn cartrefu tua 12 o fflatiau un ystafell, wedi cael eu trawsnewid i 6 o fflatiau ansawdd uchel, sy’n defnyddio ynni’n effeithlon ac sydd hefyd yn fflatiau fforddiadwy.

Mae’r fflatiau yn agos at fan gwyrdd cymunedol newydd Gerddi Heulwen, ac wedi’u lleoli yng nghanol ardal adfywio strategol Llywodraeth Cymru a’r eiddo yma cyntaf i’w ddwyn yn ôl i ddefnydd yn dilyn rhaglen gwaith adfywio.

Mae Maria Dawson un o’r tenantiaid newydd wrth ei bodd:

“Rydw i mor hapus oherwydd byddaf yn cael cymaint o fudd o’r fflat hardd yma. Rwy’n dioddef o arthritis difrifol ac roeddwn yn byw mewn fflat ar y trydydd llawr cyn hyn, felly mae pethau’n bendant yn mynd i fod yn llawer gwell ac yn haws i mi rŵan. Mae gen i fynediad hefyd i ardal gardd sydd yn mynd i fod yn hyfryd pan fyddaf yn sâl ac eisiau mymryn o awyr iach. Rwyf mor ddiolchgar.”

Dywedodd Fiona Davies, Cadeirydd Ymddiriedolaeth Tir Gorllewin y Rhyl:

“Rydym yn hynod falch o allu trosglwyddo goriadau’r eiddo yma i bobl leol. Mae safon y gwaith a wnaed gan Carroll Builders & Contractors yn ardderchog ac mae’r tenantiaid newydd yn hapus iawn gyda’u cartrefi newydd. “

Dywedodd Paul Diggory, Prif Weithredwr Tai Gogledd Cymru:

“Mae Ymddiriedolaeth Tir Cymunedol Gorllewin y Rhyl a Tai Gogledd Cymru wedi bod yn cydweithio ers dechrau 2012 i ddod ag eiddo gwag yn ôl i ddefnydd ac i safon dda, er mwyn eu rhentu i bobl leol am bris fforddiadwy. Dyma’r eiddo diweddaraf a ddatblygwyd ac rydym yn falch dros ben gyda sut y mae pethau wedi mynd ar y safle. Rydym yn gobeithio y bydd y tenantiaid newydd ymgartrefu a mwynhau byw yn eu cartrefi newydd “.

Mae’r eiddo yma wedi ei leoli gyferbyn â Datblygiad Tai Afallon ar Ffordd yr Abaty, datblygiad cyntaf Menter Tai Cydweithredol Gorllewin y Rhyl, sy’n bartneriaeth rhwng yr Ymddiriedolaeth Tir a Thai Gogledd Cymru, gan adeiladu ar ddyheadau’r gymuned.

Arddangos gwaith celf gan blant ysgol gynradd mewn datblygiad yn Y Rhyl

Mi wnaeth Anwyl Construction, y contractwyr a benodwyd ar gyfer datblygiad tai cyffrous £1.4 miliwn yn Ffordd yr Abaty, Y Rhyl, drefnu cystadleuaeth ac mae’r gwaith celf bellach yn cael ei arddangos mewn lle amlwg ar y safle.

Trefnwyd y gystadleuaeth gwaith celf ar gyfer disgyblion Blwyddyn Pedwar Ysgol Bryn Hedydd ar ôl iddynt ymweld â’r safle fel rhan o’u prosiect Byd Gwaith.

Roedd safon y cynigion mor drawiadol o dda cafodd arwydd arbennig ei greu ac mae bellach yn cael ei arddangos mewn lle amlwg ar y safle, gan arddangos holl baentiadau ac enwau’r plant. Mi wnaeth dosbarthiadau Blwyddyn Pedwar a’u hathrawon ailymweld â safle Ffordd yr Abaty ar gyfer dadorchuddio’r arwydd ac er mwyn enillwyr y gystadleuaeth dderbyn eu gwobrau.

Cyflwynwyd y gwobrau gan y Rheolwr Masnachol, Simon Rose a ddywedodd:

“Diolch yn fawr i’r holl ddisgyblion am eu hymdrechion, mae’r gwaith celf yn rhagorol.”

“Roeddem yn meddwl bod safon y gwaith mor dda nes i ni benderfynu cydnabod hynny, felly rydym wedi rhoi enwau pawb a gymerodd ran i fyny ar yr arwydd a phan fydd y datblygiad wedi ei gwblhau byddwn yn ei drosglwyddo i’r ysgol.”

Dywedodd Paul Diggory, Prif Weithredwr Tai Gogledd Cymru

“Mae’r datblygiad hwn ar gyfer cymuned y Rhyl ac mae’n rhan o waith adfywio Gorllewin y Rhyl, felly rydym yn hynod o falch o weld bod y plant wedi cymryd rhan. Hoffwn longyfarch pawb a gymerodd ran, ac yn arbennig y rhai a enillodd. Mae safon y gweithiau celf yn uchel tu hwnt, ac maent yn haeddu cael lle blaenllaw er mwyn i bawb eu gweld.”

Mae datblygiad newydd Afallon yn Ffordd yr Abaty yng nghanol ardal orllewinol y dref ac mae’n edrych dros fan gwyrdd Gerddi Heulwen a agorwyd y llynedd. Yr ysbrydoliaeth tu ôl i’r cynllun yw Tai Cydweithredol Gorllewin y Rhyl, sefydliad cydweithredol tai rhent trefol cyntaf Cymru, a ffurfiwyd gan Tai Gogledd Cymru ac Ymddiriedolaeth Tir Cymunedol Gorllewin y Rhyl.

Bydd y datblygiad yn creu saith o gartrefi teuluol tair ystafell wely newydd gyda gerddi preifat a pharcio a bwriedir ailwampio hen adeiladau masnachol ar y llawr gwaelod gyda dau fflat un ystafell wely a dau fflat dwy ystafell wely uwchben.

Enillydd y gystadleuaeth oedd Heather Dawes, wyth oed, a ddywedodd:

“Roeddwn i’n meddwl y byddwn i’n gwneud rhywbeth am wahanol sgiliau a gwaith yr adeiladwyr a sut fyddai’n edrych ar y diwedd.”

“Mi wnaethon ni drafod ac yna ei gynllunio i gyd ac roedd yn hwyl fawr, yn enwedig y lliwio i mewn a rŵan mae’n braf ei weld i fyny ar yr arwydd.”

Dywedodd Ceri Jones un o athrawon Blwyddyn Pedwar:

“Mae wedi bod yn brosiect ffantastig ac roedd yn gweithio’n dda iawn gyda’n wythnos Byd Gwaith pan oeddem yn edrych ar gyflogaeth a chyfleoedd i’r plant pan maent yn tyfu i fyny.”

Pan fydd y prosiect wedi ei gwblhau yn ystod yr haf bydd yr arwydd yn cael ei drosglwyddo i’r ysgol.

Tai newydd sbon i deuluoedd ar gyfer Gorllewin Y Rhyl

 

Mae gwaith wedi dechrau ar gynllun tai arloesol £1.4 miliwn sy’n anelu at ailadeiladu cymuned yn y Rhyl.

Mae datblygiad newydd Afallon wedi ei leoli yn Ffordd yr Abaty yng nghanol ardal orllewinol y dref ac yn edrych dros fan gwyrdd Gerddi Heulwen a agorodd y llynedd.

Y sbardun y tu ôl i’r cynllun yw Menter Tai Gydweithredol Gorllewin y Rhyl, sef menter tai rhent trefol cyntaf Cymru, a ffurfiwyd gan Tai Gogledd Cymru ac Ymddiriedolaeth Tir Cymunedol Gorllewin y Rhyl.

Meddai Fiona Davies, Cadeirydd yr Ymddiriedolaeth:

Mae hwn yn gyfle cyffrous i deuluoedd lleol i elwa o dai fforddiadwy newydd sbon o safon uchel. Nod y fenter gydweithredol yw ailadeiladu’r gymuned glos a fu unwaith yn ffynnu yng Ngorllewin y Rhyl.”

Mae tenantiaid yn dod yn aelodau o’r cwmni tai cydweithredol, sy’n rhoi hawl iddynt i gymryd rhan yn y ffordd y mae eu heiddo yn cael ei reoli a phenderfynu a dylanwadu ar gynlluniau a phrosiectau’r dyfodol yn yr ardal.

Croesawyd y datblygiad gan Barry Mellor, Maer y Rhyl a ddywedodd:

Mae’n wych. Dyma’r union beth yr ydym wedi bod yn galw amdano ers amser hir iawn, a bydd yn rhoi hwb sylweddol i’r ardal hon.

 

Mae meddwl bod yr Ymddiriedolaeth Tir Cymunedol wedi gwneud hyn yn anghredadwy ac i gael Anwyl, cwmni lleol, yn gwneud y gwaith adeiladu mae’n ardderchog – beth rydym ei angen rŵan yw i gwmnïau eraill ymuno a rhoi help llaw.”

Bydd adeiladwyr nodedig Anwyl, sydd wedi eu lleoli yn y Rhyl, yn adeiladu saith o gartrefi teuluol tair ystafell wely newydd gyda gerddi preifat a lle parcio ac yn ailwampio hen adeiladau masnachol a fydd yn gartref i siop gymunedol a becws ar y llawr gwaelod gyda dau o fflatiau un ystafell wely a dau o fflatiau dwy ystafell wely uwchben.

Dywedodd Paul Diggory, Prif Weithredwr Tai Gogledd Cymru:

Mae Tai Gogledd Cymru yn falch o fod yn rhan o’r gwaith adfywio pwysig yma yng Ngorllewin y Rhyl.

 

Mae Afallon yn brosiect tai cymunedol deniadol sy’n darparu cartrefi go iawn i deuluoedd ac sydd wedi eu hadeiladu i ansawdd da a safon effeithlonrwydd ynni uchel hefyd.

 

Ei nod yw creu cymuned fywiog lle mae teuluoedd a busnesau yn dymuno setlo a ffynnu.”

Dywedodd Joan Butterfield, Cynghorydd Gorllewin y Rhyl ar Gyngor Sir Ddinbych, sydd hefyd yn aelod o’r Ymddiriedolaeth:

Mae’n gyfle gwirioneddol wych i’r bobl yma gychwyn adeiladu cymuned go iawn o’r diwrnod cyntaf.

 

Mae’r prosiect yn fenter gymdeithasol wirioneddol sy’n cynnwys y bobl sy’n byw yma ac yn rhoi cyfleoedd a sgiliau iddynt, ac rwy’n credu y bydd yn rhoi hwb i’r Rhyl yn gyffredinol.”

Dywedodd Nikki Jones, Cyfarwyddwr Menter Tai Gydweithredol Gorllewin y Rhyl:

Rydym yn awyddus i glywed gan deuluoedd lleol sydd am fod yn rhan o’r cwmni cydweithredol a gwneud cais i fyw yn y tai teulu newydd.

 

Os oes gan bobl sydd ar hyn o bryd yn byw neu’n gweithio yn y Rhyl neu ardaloedd cyfagos ddiddordeb mae yna amser o hyd i wneud cais i ddod yn denantiaid.”

I gael mwy o wybodaeth am sut i wneud cais ffoniwch 01745 339779 neu anfonwch e-bost at [email protected].

Datblygiad Ffordd Whitegate yn nodi ehangu Tai Gogledd Cymru yn Wrecsam

Mae’r gwaith wedi dechrau’n swyddogol ar ddatblygiad tai cymdeithasol newydd gwerth £1.5 miliwn yn Wrecsam, fydd yn darparu 12 o dai rhent fforddiadwy newydd yn yr ardal.

Y datblygiad  hwn yw datblygiad cyntaf TGC yn y rhanbarth, a hynny mewn partneriaeth â Chyngor Wrecsam.

Trefnwyd ddigwyddiad gan Tai Gogledd Cymru I i nodi dechrau’r gwaith ar y safle, ac er mwyn croesawu partneriaid a’r Cynghorwyr lleol Mark Pritchard ac Ian Roberts i roi mwy o wybodaeth iddynt am y datblygiad pwysig hwn.

Dywedodd Paul Diggory, Prif Weithredwr Tai Gogledd Cymru:

Rydym yn edrych ymlaen yn fawr i gael cychwyn ar y datblygiad hwn yn Wrecsam. Mae’n nodi ehangu i Tai Gogledd Cymru ac edrychwn ymlaen at weithio gyda Chyngor Wrecsam. Trwy weithio mewn partneriaeth agos fel hyn gallwn wella rhagolygon tai teuluoedd ifanc lleol.”

Mae’r safle wedi’i leoli oddi ar Ffordd Whitegate yn Wrecsam, ac yn y gorffennol cafodd ei ddefnyddio fel maes parcio. Bydd TGC a’r contractwyr a benodwyd, Grŵp K & C, yn trawsnewid  y safle, gan ddarparu 12 o gartrefi sydd eu dirfawr angen yn yr ardal, sef 6 tŷ gyda 2 ystafell wely a 6 fflat un ystafell wely.

Dywedodd y Cynghorydd Ian Roberts, Aelod Arweiniol dros Dai, Cyngor Wrecsam:

Mae tai fforddiadwy yn flaenoriaeth strategol i’r Cyngor a bydd y datblygiad hwn yn helpu tuag at ddiwallu’r angen yma.”

 

Prif Weinidog Cymru yn agor Cae Garnedd yn swyddogol

Ar ddydd Mercher 2 Medi, 2015 agorwyd Cae Garnedd, sef cynllun Gofal Ychwanegol arloesol Tai Gogledd Cymru, yn swyddogol gan Carwyn Jones AC, Prif Weinidog Cymru.

Daeth preswylwyr, staff a gwesteion ynghyd i ddathlu agoriad swyddogol y cynllun a rhoddodd Carwyn Jones AC help llaw wrth blannu coeden addurnol i nodi’r achlysur cyn cyfarfod preswylwyr dros de prynhawn.

Mae ‘Cae Garnedd’ yn gynllun Gofal Ychwanegol newydd gwerth £8.35 miliwn a adeiladwyd ym Mhenrhosgarnedd, Bangor, a ddatblygwyd mewn partneriaeth rhwng Tai Gogledd Cymru, Cyngor Gwynedd a Llywodraeth Cymru. Y cynllun hwn yw’r cyntaf o’i fath ar gyfer Bangor ac mae’n cynnig ffordd amgen o fyw ar gyfer pobl dros 55 oed, gan ddarparu byw’n annibynnol wedi’i gefnogi gan raglen gofal a chefnogaeth y gellir ei haddasu a’i hasesu wrth i’w hanghenion unigol yn newid.

Manteisiodd gwesteion hefyd ar y cyfle i gael eu tywys o amgylch y cyfleusterau gwych yng Nghae Garnedd. Mae’r cynllun yn cynnwys 15 o fflatiau un ystafell wely a 27 fflat dwy ystafell wely manyleb uchel, gyda phob un yn cynnwys ei chegin ei hun, ardal fyw ac ystafell ymolchi, yn ogystal â llu o ardaloedd cymunedol modern a chartrefol gan gynnwys lolfa; bwyty; lle trin gwallt ac ystafell driniaeth harddwch a llawer mwy.

Dywedodd y Prif Weinidog, Carwyn Jones:

Mae’r cyfleusterau yma yng Nghae Garnedd yn rhagorol ac yn rhoi cyfle i bobl hŷn barhau i fyw’n annibynnol. Rwy’n falch bod Llywodraeth Cymru yn gallu cefnogi’r cyfleuster hwn gyda £4.8m o arian Grant Tai Cymdeithasol. Mae cynlluniau fel Cae Garnedd yn lleihau’r ddibyniaeth ar ofal preswyl neu’r system gofal hir dymor a sicrhau nad yw pobl mewn perygl o fod yn unig neu’n ynysig.

Mae cynlluniau fel Cae Garnedd hefyd yn rhoi hwb i’r economi drwy gefnogi adeiladu a’r gadwyn gyflenwi, a thrwy ddarparu swyddi a phrentisiaethau ar gyfer yr ardal leol.”

Dywedodd Paul Diggory, Prif Weithredwr Tai Gogledd Cymru:

Rydym yn hynod o falch o allu dod â’r cynllun hwn i’r ddinas, y cynllun cyntaf o’i fath ym Mangor. Mae’n darparu dewis amgen pwysig i aelodau hŷn ein cymuned wrth iddyn nhw ystyried eu hopsiynau tai.

I lawer o bobl hŷn, gall cyfleoedd byw gael eu cyfyngu o un pen y sbectrwm i’r pen arall, o fyw’n annibynnol llawn i ofal preswyl neu nyrsio. Mae Gofal Ychwanegol yn pontio’r bwlch hwn ac yn cynnig dewis i bobl barhau i fyw’n annibynnol gyda chefnogaeth a gofal pan fo angen.”

Chwith i dde:

  • Ian Williams, Advent
  • Chris White Grwp K&C
  • Cynghorydd Ioan Thomas, Cyngor Gwynedd
  • Peter Gibson, Cadeirydd, Bwrdd Tai Gogledd Cymru
  • Prif Weinidog, Carwyn Jones
  • Paul Diggory, Prif Weithredwr Tai Gogledd Cymru